Zokhawthiang hi a hming thin chu Kani a ni a, Mizoram Hmar tawp, Assam leh Manipur ramri bul a awm a ni. Sawrkar in Mizoram chhunga khua, vai hming chawi ho a phuah that khan “Kani” atangin “Zokhawthiang” ti a thlak a ni . He khua ah hian in 38 a awm a, a mi cheng te hi Hmar hnam an ni. An in te hi hmanlai Mizo in, di in a ni tlangpui a, rangva in chu a awm ve pheuh pheuh bawk. Zirna in pakhat, primary leh middle in kawp a awm a, mahse pindan pathum chauh a nei thung. Zirlai 50 bawr vela an awm ve bawk. SSA Hmalak na hnuaih building tha tak an nei. He khua atang hian Pawl 10 pass pakhat awm tawh a, midang pakhat in a zir ve mek bawk. A khaw mipui te eizawnna tlangpui chu Loneih a ni a, luisa, a bik takin chengkawl a tam hle. Eichawp dawr pakhat, kuhva dawr pahnih leh thingpui dawr pakhat a awm. Kohran chi thum an awm a, a tam ber Presbyterian niin UPC (NE-I) in an dawt a, UPC(Miz) in 2 an awm ve bawk. Loneih a eizawng an nih avangin an khawsak a harsa em em a, an chaw ei vet u nih a in thlhrunawm duh hle. Electric thirhrui a thlen loh avagin in tin mai chuan solar module an hmang a, a environment friendly hle. Mobile network a awmlo a, WLL erawh a chang changin a hman theih a, minute khat biak ah Rs.7 chawi a ngai a, kan kal lai erawh chuan a lo chhe hlauh a.
Map Aizawl- Zokhawthiang
A kalkawng: Zokhawthiang hi Aizawl atang chuan km 200 bawr vel a ni a, Mizoram map hlui ah chuan Kani tiin a hming a chuang a. A kal kawng chu, Aizawl- Sesawng-Khawruhlian, Darlawn, Ratu, Sakawrdai- N. Tinghmun- Zokhawthiang. N.Tinghmun atanga Zokhawthiang hi Jeep able road niin a kawng a te hle. Km 10 vel niin darkar khat leh a chanve vel tlan a ni.
Tawnhriat thenkhat
- Tui harsat zia mawlh mai kha aw. Inbual tur chuan khaw dai lui te pan a ngai a, ke a kal chuan haw lamah kan thlan huh leh vek a, inbual faiin awmzia a nei tlem hle. Tui chawina a hlat avangin hmai phih leh ha nawhna tur ringawt pawh inthlahrun awm tham a ni. Vanneih thlak takin mineral water kan keng hnem hlauh a.
- Ek in mawlh mai kha! Ka zing tho inthiar turin an ekin ka pan chu beisei a sang ngeka hawi hai der mai. An ekin chuan kawngka a lo neilo a, zan thim a ka inthiar ta lo kha inchhir thlak tak a ni! Plastic commode chu an hmang a, mahse khur hran a neilo a, a luang chhuak tawp mai a. Chhuak tawh si hek, ka thut ve luau kha.
- Zan mut huphurh thu- Nileng a motor a tlan chau ti lo chuan mut kha ka huphurh tlat mai pek a, a chhan chu chukchu an ni!. Ka tlai leng haw chu ka thlen in pa nen ka titi a, ka hnungah hian thil vak hi ka hria a, ka man a, chukchu pa lian tak mai hi a lo ni a. Zan a kan titi lai te chuan chukchu hi ke ah te, banah te an rawn vak lawn thin a, anni lah chuan engah ngai hek suh. Muthilh lain taksa ah an rawn lawn anga, ka ah te hian an vaklut riau riau ang tih ka hlau a. Zan mut hun a lo thlen chuan ka thosilen ken chu uluk tak mai hian ka bilh lut a, thosi aiin chukchu ka hlau zawk a!
- Thingpui thak kha aw… Duhsakna avangin kalna apiangah chuan thingpui thlum min lo lumsak thin a, mahse an thingpui chu a thak hlawm a. Bungbel an ngah loh avangin an hmar bai siamna bel ah thingpui an chuang thin ni fa hmiang ka ti mai.
- Chawhmeh thak hmeh chuan digene ei uluk a ngai.. An chawhmeh ah khan hmarcha hi an uar thin hle mai. Zanriah ah duhsakin Ui min lo talh sak a, ei tura kan kil chu uisa buhchiar min suah a, a thak hle mai lehnghal a. Uisa buhchiar thak leh chi chauh chawhmeh a rin chuan, “chaw puarin nge ka puar tui puarin aw?” ti a in zawh awl duh hle.
- Kalkawng kha tawngtai uluk a ngai hle mai!. Jeepable road, motor leng tawk tawk kha a ni hlawm a, kham panga tlan lah a tam,c ke a za duh thin hle. Hnimhnawk, mau leh thing thenfai lawp lawp la a tam. Kal lamah zuhrei hawng lam ang main kan chuk ngar ngar a, haw lam a chho elh thin hle bawk. Kan haw dawn zanah tih tak meuhin ruah a han sur mai chu muttui a har ngei mai. Kalkawng a ping anga, a khua ah cham belh a ngai ang tih mawlh mai kha ka hlau a. Khua a var hnu a ni eng mawi tak lo lang chu, khawilai nula hmeltha ai chuah hmuh a nuam zawk daih mai!.
Ka rilru a cham reng chu an khawsak harsat zia leh tih theih van zia kha a ni. Sawrkar tan lah khaw mawngping, in 38 awmna han cheibawl vak khan awmzia a nei tam silova. Khaw kawng kar a hla a, motor lah thal va ek char lai bakin a tlan silo. An thlai thar te chu hralhna an nei lova, Manipur lama an kalpui lahin hel hovin chhiah an chawitir bawk si. An khawngaih thlak hle. Ka ngaihtuahna tithui tu dangleh chu, “kawngpui hi thing lah mau, ramsa te helma” an tih hi a ni. Kawng a tlang takah chuan an ramngaw tha a thing te kha an zai thin a, kawngpui bulah chuan thingzaina hlang hi a lo indawh fur mai si a. Tun tum ka zin zet chu a nawm dan a dang a, mihring dinhmun, khawpui leh thingtlang in thlauhzia ka hriat chian phah a, hlawkna tam tak ka char chhuakin a nawm dan erawh a dang deuh.
Zokhawthiang Biakin
Solar power
Kangvar
Naupang te
A khua
Khua
Inbualna hmun
Uisa buhchiar
Zinkawng
Zinkawng
Zokhawthiang Biakin
Solar power
Kangvar
Naupang te
A khua
Khua
Inbualna hmun
Uisa buhchiar
Zinkawng
22 comments:
an khua cu a van fai hmel reuh... nom hmel reuh ka ti
lalna ram chu nuam hmel ngei mai!!!
Solar module an hmang thei khi an vannei a, an changkang ru riau tlat.
Ei leh in a harsa chu an lainatawm hle mai.
Thingpui thak chu in a har keipawh ka ring, hehe. An ek dan mawlh khi :)
Development hi a zuan in a zuang tak meuh em?
Zin renport ngaihnawm tak a ni hotupa. Ka chhiar chhuak dap a. Enge in va tih chu ka hre lo na a, thil pawimawh tak chu in va ti phawt ngei ang a. Hetianga thingtlang lam harsatna in va hriatpui leh in va nunpui hram hram hi a tha tawh hrim hrim a. Hei hian Mizo theuh theuh tih mai pawh a awl duh khawp mai. POWER supply te pawh Aizawla hman sen loh state dangah an hralh chhang e, an ti a. Mahse thingtlang lamah erawh mawmbati nen an la khawsa thung si. Mizoram hi aizawl leh a chheuh vel chauh hi em ni, tih pawh awl duh tak a ni.
Zokhawthiang chu ka la thleng hauh lo na a, an harsat dan tur erawh suangtuahnain a hrut kual a. An khaw kuang deuh hlekah khaw lian zawk a awm chuan awm fin tir mai te pawh a tha mai thei a. In 38 chauh chu an khaw awmna a han fal viau phei chuan sawrkar tan pawh a buaithlak hlein ka ring. Chuvangin an khaw kiang hnai deuhah in chhungfin vek thei se la. Aibawk khua ang deuh hian. Tichuan sawrkar tan pawh hmalak a awl deuh thei ang ka ring.
Uisa buhchiar ei chu a har fu lo maw? ka la ei miah lo va. Tin, Hmar bai a nih ngat phei chuan a thak bon top ngei ang. Hmar bai hi a thak ngam tan chuan a tui an ti viau mai a, kei erawh chuan ka ti hleithei lo va. Saisu an bai erawh ka ti thei zek thung a. Hmarcha erawh tlemin titlem thei deuh se ka ti fo thin. Kenia rama an missionary ten hmarcha ei chu sual a ni, tih nen chuan a inhlat hmel khawp mai tiraw..:)
A khaw kawtthler hi nawm hmel riauin ka hria..Zin ve chakawm hle mai. Thingtlang zin hi nuam ka ti viau thin mai. Naupang photo khi interesting hle mai.
A ngaihnawm hle mai. Khawpuia chengten kan hmuhphak siloh-ah hian, hetianga thingtlang khaw rethei tak takte hi an la tam mai chu ani sia. Hmasawnna, changkanna te hi avan inrual mawk tak em !
Chukchu han hlauh tlat mai chu :-)
@Anonymous hian min lo phone a, "ka in sing in lo mai" a ti a, ka hrethiam mai ang em-i chu :). A khua hi a fai, motor chu lut se a dang ang em aw? hehe
@lalrin A khaw lalpa nih chu ka thlang lo ta mai :P
@ codeAries- Ei leh in chu a harsa tak meuh meuh a ni. Kuhva erawh a man a in ang ve tlat :). Solar module hi pakhat Rs.6000.00 velin an lei a (an sem a ni mah mah VFDC hnuaih) Charge that chuan zan 5 te a daih ve. In 1 ah bulb pakhat an nei theuh a
@ Puia, hotupa chu i ti lawmawm thin hle mai. Ram veitu tan chuan "vei"tur hi a tam a nih hi. Kan sawichhuah pakhat kan sawi loks, Kan politicain te hi an tha vek, ram pawh an hmangaih a, mahse a ngaihna an hrelo. "Ram hmangaih a, a kawnghmang hria" hotupa te hi kan mamawh a ni e.
Pem kha ka sawi mawi ve viau a, mahse "kan khua" an ti ve tang asin.
UIsa buhchiar chu ka vawi 1 eina a ni keipawh.
@Puia, hmarcha ei-sual chu ka vawi khat hriatna.
@Epistemology, Photographer hi ka nilo ve chiang kuang tih hmu thiam khawpin i thiam si a, ka va in thlahrung tak em. Thla kha lak viau ka tum a, batry re-charge na tur awm silo a, ka in ren ngot a
@Seki, Zokhua lama an harsatna hi hmuh thiam a ngai khawp mai. Rilru a na thar leh thin.
Chukchu kha- ka mu ang palh ang... mut tu har dawn em a, vah them them mai chuan, Nula lam te chuan min lo zut heuh heuh se chuam mut a tui anga :)
A ngaihnawm hle mai. A hmuhnawm bawk. I zin leh hun chu spare battery keng ngei tawh la a tha ang :)
A ngaihnawmin a bengvarthlak hle mai. Mizoram hmar lam hi ka fang chipchiar ve hle tawh emaw ka ti a, he khua hi ka lo la tlawh miah lo a nih hi! Vawksa kan thak em em chiah, a bak hmarcha rawt ni leh tawp kan hmehte pawh ka hrechhuak.. khaw lum lai ngei maiin!!
'Thalaite khawvelah Thalaite tan kawl a eng lo,' tiin, Aizawl leh khawpui dangah kan au kan au a, kan bul lawkah hian hmabak (future) nei thui lo lutuk thahnem tak, kan Mizo pui ngei an awm tihte pawh hi kan aupui ve reng a tul khawp mai.
"An ekin chuan kawngka a lo neilo a"...hemi pics hi ka hmu chak hle mai aa!!..nei mial law mi?..hehe..an chaw eina kha a bon hle mai!!..nula hmelthra deuh fai ving veng kilpui na atan chuan a thra aangaa!!..anih si loh chuan chuti hlauh thung ang...hahaha..an khaw kawng molh kha, in driver chu a chhuanawm hle mai, a passenger pawh in huai!!
A khaw kawng chu fur laiin a nelawm vak dawn loh anih hi. Uisa buhchiar hi ka la ei ngai miah lo, ka ei ve chhin chak. Hmar pa ka ni bawk a thak hi chu ka ngam ve fu.
I thosilen ken chu chukchulenah i hmang tihna a ni maw? :D
hetiang ang thingtlang ah hi chuan naupang te nikhua ka hre ve chang chang tih in ka kal ve tawh...khawbel khua ah...kan thlen in te kawt a sunhlu kung te, biakin a bang dap te, kawlbahra chhum chawlhni inkhawm ban a kan ei te chu ka la hre ria ruai..tuikum lui a an lei dawh ah kan kal lai a a inthen ka hlauh ang reng zia te...phaisen lui kan dai kai dawn vel a lui luang in ka ke a pheh teuh zia te ka la hria...vawiin thleng in motor ala lut lo an ti than in ka hria
zokhawthiang chu an kawtthler vel a fai hle mai a..mahse thingphun ni awm tak te an khawlai a khi a awm lawi si khi maw le..mit a ti tlai hle mai!
@tetea, i lo leng lut a lawmawm, lo leng fo dawn nia. Batary hi zin remchan ah lei a ngai a ni, mamawhna a tam, gud suggestion
@zaia, ngaihtuahna intawm kan nilo maw :). "Hmarthimpui" an ti hi awmlo ka ti talo e
@Esi, photo chu lak chi loh :), ka driver kha a nam zeuh zeuh a, a fel hle a, khalh thiam bawk. mahse a handbrake a kut nghah chang chu awm tho mai :)
@luliana, keipawh uisa buhchiar hi ka vawi khat ei na, a thak, a sa ai chuan a buh kha a tui zawk mahin ka hria.
@avena, hotute chuan naupanlai an sawi dawih mai :). Hetiang zokhua a zin hi nawmna tak a nei ka ti. Kan in unau bik hliah2 hian ka hre ve a. Kan nau 1 chu zokhua ah an hruai a, mizo buh sen deuh hi an lo chhum a, "vawk chaw ka ei duhlo' a tih mauh mai chu... nang chu naupan lai pohin naupang fel tak i ni ngei ang.
@
Lunglenthlak hle mai. Mizoram chhim tawp Saizawh 'E' a ka kal tum min ti hre chhuak. I sawi ang hian ek in khan kawngkhar a nei mumal lo va. Ka'n bung ve thla ngawt a, bulah hian an lo vei an lo vei mai leh nghal a. 'Thin thi'-a ek a har duh ngei mai:))
@ faka, a dik; thin thi a ek a har :). Tun sunday khan ka thianpa zinna photo ka en ve a, a la thingtlang lehchhawng a ni awm e. A knua lut tur pawhin Km 7 vel ke a kal a ngai a, sikul pawh an lo neilo a.
Thlalak atang ringawt chuan holiday resort te pawh a ang zawk. An khawsak harsa lutuk chu an lainatom hle mai. An rawt dan ang khian khaw dang fin mai a tha angem le?
@mesjay, an tum lo, ka han sawipui ve ngial pawhin pem an hreh khawp mai. "Sikul tha nei ila kan pung mai ang" an la ti deuh deuh. Pa pakhat chuan ka fapa ka phum tawh a, ka damchhungin he hmun hi ka chhuahsan theilo" a ti mauh bawk a. MLA in kawng leh electric a tiam a ni awm e, inthlan hma khan :)
I zinna khua leh achhehvel ah hi chuan kan mikhuak lo khop tawh mai. N.Tinghmun atanga a pan thlakna kawngah khan kan motor achhia a kal nawn leh ka chak hran tawh lo..Mahse an dinhmun chawikang tur hian tihtheih engngemaw tal kan neih theuh ka ring.
@rsi, awww ka thiannu te hi i hmel phu lo hian i lo vakzau ve hle mai. Zaithiam khaw fang nilovin development lam buaipui fankual a ni zawk em? :) N. Tinghmun atanga kan kal, kawngpui te ta ltk kha... i hrethiam dawn a nih chu. N.Tinghmun thleng kha kawng nuam takin an lai tha tawh a, a laitu pa hi "Pathian thu awih" an ti. Mizorama kawng laih ka hmuh tawhah a la thawk tha ber awm e.
Chhiar a nuam dap dap hle mai..Chhiar pah in ka mitthla a, ka zin ve emaw ka ti hial a lawm le..!!
Post a Comment