Kha ni kha

Inneih sawmna a lo thleng, ka en ngawih ngawih a, ka bing chuk chuk mai. Ka hun neih dan ka han en thuak thuak a, chawhnu lam chu ka hman reng mai. Ngaiteh a hun leh ni a lo thleng ta, aw a va han mangan thlak duh ve. Khawnge ka huaisenna zawng zawng te kha? Hui ham ha, engpawh nise ‘ka nih nih ka ni ang’, mualpho pawh huamin inneihna a kal tur chuan ka inchei chhuak ta a. Hun liamta te ka thlir let a, kan hlimni leh tah ni te, a cham reng mai lairil ah. Kumpui lingleta a sur a sa hnuaia kan lenlainite kha aw. Tuantul vanga kan inthen ni te, mittui tla chunga a hmel ka hmuh ni te kha, thamral lo mithla ah hian a cham reng mai.

Chawhnu her chu a ni ta reng mai, inneihna lama kal tur chuan ka hna ka chhuahsan hma a, ka kal ta beuh beuh a. A kawngte chu ka hre hneh hle mai si, an peng ka thleng ta, ka huaisenna zawng zawng chuan min kiamsan a, ka thau ah min man tlat mai. Chu pengthuam chu zawh ka zuam ngang lo, ka kal tlang ta, ka va han dawlduap em!.

Chu ni, ka tihbai em em mai chu, ka thiapa nau nupui neih ni a ni, amah chuan vanduai thlak takin kum 9 kalta khan min kalsan tawh. Nitin mai hian a u a chhun tawlh tawlh mai si a, a pianzia, tawngdan leh chetzia thlengin. Kal ta ila a thlan ka tlawh tum a ka mualpho ang khan ka mualpho ngei ang. Ka huaisenna in min kalsan ni kha aw. Mo lawm tur chuan nakinah ka la kal ve ang, ka huaisen deuh hunah!.