Malaria avanga thi kan tam e

Malaria avang hian Mizoram-ah hian tawrhna nasa tak a thleng tawhin a thleng mek zel ani. Tun kum 2005 June thla thleng report a a lan danin mi 50 malaria avang hian nunna chan kan awm a,malaria hrik hmuhchhuah kher loh mahse malaria ni ngeia hriat(Clinical malaria) avanga thi tam tak an awm bawk. Kum dang khaikhin chuan a tam hle. Kum 17 liam ta chhung khan malaria avang hian kum tin mi 35 vel zelin nunna an chan a , thi kan tam ber kum chu kum 1999-ah a niin, mi 73-in nunna an chan a, a tlem ber kum chu kum1990-ah a ni a, mi 8-in nunna kan chan a ni. Tin, natna dang zawng aiin malaria avang hian kumtin nunna chan kan tam ber zel bawk Hetianga kan tawrh nasat em avang hian Malaria leh a thlentu thosi chungchang zir chian hna(Research) kan kalpui mek a ni.
Malaria leh DDT
Mizoramah hian malaria chi hnih a awm a chungte chu Malaria pf kan tih mai Plasmodium falciparum in a thlen leh malaria Pv Plasmodium vivax-in a thlen te an ni. Amaherawhchu kan thihpui thin erawh hi chu pf zawk hi a ni. Malaria hi thosi chi khat Anopheles kan tih mai te hian an kai chhawng thei a, malaria tihremna tha ber chu heng thosi te hi tihtlem emaw tihrem a ni. Hemi avang hian kumtin Health Department bultumin thosihlo DDT kah thin a ni.
DDT hi India ramah hian kum 1944 atangin British sipaite khan an hmang tan a, thosi tihrem nan a that em avangin an hmang uar hle. DDT kan hman nasat avang hian kum 1966 phei kha chuan India ramah malaria avanga thi an awm lo ni a report a ni. Hetiang hian DDT hi lo hlawhtling hle mahse chu indonaah chuan thosite chuan tlawm mai an tum bik awzawng lo, kum 1968 chho atang khan India rama DDT haw lo(Resistant) thosi hmuh tan a lo ni ta , chutiang ang bawkin malaria natna te chuan a damdawi chloroquine te chu an haw lo(Resistant) thei bawk, hei hi Assam State ah kum 1971 ah khan India rama hmuh hmasak ber a ni. Hetiang anih avang hian Malaria natna chuan punlun lam a pan leh ta a ni. Mizoramah hian kum 1959 atang khan DDT hi kan hmang ve tan a, kum 1979-1989 khan BHC kan hmang tih loh chu DDT hi thiso hlo atan kan la hman ngar ngar a ni.
Thosi lam ve thung:
India ramah hian Anopheles chi ang thosi hi 58 an awm a, chung zinga chi 28 vel chu Mizoramah hian awmvea ngaih a ni. Heng chi 58 kan sawi zawng zawngte hian malaria natna hi an kai darh vek lova an zinga chi 10 vel chauh hian malaria natna hi an thlen thei a , chung zinga chi 6 chu Mizoramah hian a awm ve a ni.
Mizorama malaria dona a hma latu ber chu Health Department hnuaia Malalria Cell te an ni. An ni hian Central lama an hmalak dan duans a(Plan of Action) chu Mizoramah an kalpui thin. Tun hnai a an hmalakna tlangpui te han tarlang ta mai mai ila: Kum tin DDT kah, Mizorama malaria thlen dan (data) vawn; Malaria hrik a thlawna enna hmun siam; Mipuite hnenah Damdawi(Insecticide Delamethrin-trade name K-Othrin) chiah sa thosi len 190,000 vel an sem tawh; Mizorama hmun 1,044 ah malaria damdawi lakna Drugs Distribution Centre (DDC) leh Khawsik enkawlna Fever Treatment Depot (FTD) hmun 161 velah an nei mek. Tin, malaria dona programme kan hman hi National Vector borne Disease Control Programme, ( Thilnung dang atanga natna inkaichhawn theih chi ang natna dona programme) 1st April 2005 atanga hman tan a ni.
KUM 2005 a malaria pun nachhan ni a

Malaria avanga thi tam ta viau leh malaria avanga thi kan tam ta viau hian ngaihtuahna a titam hle mai. Hetia malaria a tamna chhan nia langte han chhuidawn mai mai ila:
Mau tam tur avang hian Mizoramah mau kan sat nasain a hman tangkai theihna kan zawng nasa hle, hei hian malaria a titam thei. Malaria leh mau chuan inkungkaih awm loh tak a ni a, mahse mau kan sah hian a bul la ding te kha ruahtui tlinna hmun, thosi tuina hmun tha tak kan siamsak a, thosi a tam chuan a natna thlen malaria a tam mai dawn a ni.
Mizoram bouruak hi thosi inthlah chhawnnan a tha hle. Tin, kumin kan ruah sur dan hi thosi te inthlah chhawn nan a tha em em a ni. Ruah tlem a sur a chu chu nisa tha takin a zui deuh zel a. Kum dang angin khua a cheng lova, hei hi thosi inthlahpunna atan a tha hle.
Mizoramah hian thosi hlo kan hman ber DDT hi kan rama thosi te hian an haw tawh lo em ni? tih zawhna hi chhan theih mai a la ni hrih lova, hemi chungchangah hian chiangkuang zawka research tih a ngai nasa hle. DDT resistance hi khawvel hmun dang leh India ramah ngei pawh a tam tawh si a.
Malaria damdawia kan hman lar ber Chloroquine leh Primaquine te hi malaria natna te hian an haw lo(resistant) thei kan tih tawh kha. Mizoramah pawh Health Department in a report danin Siarang, Kolasib leh Hnahthialah te chuan heng ang hi hmuh tan a ni ve ta. Hemi avang hian malaria natna avanga boral kan tam ta a ni ang em?. He lamah pawh hian research tih a la ngai nasa hle.
National Vector borne Disease Control Programme hmalakna hnuaiah Mizoramah hian Malaria damdawi lakna hmun (DDC) 1044 vel atanga damdawi lachhuak zat leh malaria natna vei tam dan report neih a chakawm hle mai. Heng damdawi kan sem thin primaquine leh chloroquine te hi mi tam tak hian Malaria natna laka invenna ah kan ngai thin. Kan hriattur chu heng damdawite hi malaria natna laka invenna nilovin a damdawi chauh a ni Hemi avang hian malaria laka kan invenna tha ber thosilen leh thosi hlo te, in leh a vela tui tling tih bo te hi kan ngaihthah em ni ang le?
Mizoramah hian malaria pf hi a tam hle a, malaria pf hian ‘thluaka lut’ kan tih mai ‘cerebral malaria’ a thlen thei. Lu na, khawsik malaria nih inringte chuan Chloroquine leh primaquine presumptive treatment ni 3 chhung ei mai hi a tha. Hetianga damdawi ei hian malaria thluaka lut chi ang hi a dang thei.He inenkawlna hmanga kan dam mai thei lo a nih chuan damawi hmunpui lam pan mai hi a him hle.
Heng ka han tarlan te bakah hian puh mawh tur dang tam tak a la awm thei awm e. Mizoramah hian malaria chungchang zirchianna bik hi kan la nei tam lo hle. Scientific documantation 2-3 vel, Central lama kan mikhualten Health Department kaltlanga an nei tih mai loh chu engmah kan nei lo. Chuvang chuan kum tina kan thih tamna ber malaria hian zirchian a mamawh em em a ni tih a lang thei a ni.