'Chichawm' Chi-chawm- Chawh chawrawi, chawh pawlh tihna a ni thei awm e. He hming ka hmanna chhan tawite in ka han ziak ange.
Vawi khat chu thingtlang tlangval pakhat hi pawl 10 a fail hnuah Aizawl a Hostel pakhat ah chawchhum (cook) a inhlawh turin a lo chhuk a. Mathematics a thiam avangin hostel naupang te chuan zan lamah an rawn thin a, mi taima tak leh mi in zirmi a nih avangin pawl 10 chu exam leh in a pass a. Chawchum atang chuan middle school lamah mathematics zirtirtu ah a kaisang a, high school ah Mizo a zirtir bawk .Chawchum atanga zirtirtu a kaisan duhtawk mai lovin zing college ah a zir chhunzawm a, P.U, B.A leh a hnuah M.A thlengin a pass chho ta a, tunah chu ama pualin school a nei ta hial a.
He mi tumruh hi kan zirtirtupa thin a ni a. Lehkhabu pakhat "Chichawm bu" ti a hming a vuah hi a nei a, zirlai pangai bakah hian class ah min chhiar sak thin. A kutziak nalh taka a ziah, a kawm hnum hlaraha a siam hi a lo keng thin. Thu ngainawm, maksak leh dangdai hrang hrang a lak khawm, mizo tawng tluangtlam, nalh taka phuah a ni. Ngaihnawm kan ti in kan ngaisang thei hle a. Kha lehkhabu ka rilru a cham reng thin a hming chawi deuh in "CHICHAWM" hmingpu, blog ka lo siam ve ta reng chu ni in. Amah Pu Kimtea rilru leh a chhung thu awmte chu tluk rual awmlo, a ne pawh ek pha lo mahse, amah ngaihsanna rilru avang liau liauvin he ziahna hmun hi a lo chhuak a ni e.
