Chukchu* te hi rannung maksak tak an ni. Mithiam ten an sawi dan chuan, "Atom bomb pawh hi puak in mihring te hi mang vek mah ila, chukchu te hi chu an dam chhuak ang" an ti thin. Tak tak nge chu ka hre lova, mahse an damkhawchhuana hrui hi chu a fei hian ka hria.
Zanlaai han thawha, eng hmeh rual a thimtham chuha an tlan dial dial hmuh chang hi chuan mit a kham duh phian a, tin eitur te an lo bawm ang tih a hlauhawm bawk si. An tam viau phei chuan an inthlah pung zel ang tih hlauhna nen, ral te beih a beih ka tum ta a.
Indona chu kan tan ta, tel, spraying bottle leh deltamethrin* (Buttox)nen ka tang a, an ni lam inringlo chu ka bei ta. Chhunah chhuar ka dah ruak a, ka phuh ta ser ser mai. An kalkawng awm nia a ka hriat te chu bang kil nen ka phuh chhuak vek a, a rim a reh hnuah bel te leh thildang, chhuar a mi chu ka dah let leh a. A ni, heti hian a lo awm ta a, zana ka thawh chuan an lo thal phung mai. Kar khat a liam ta, eng hmeh en ruala tlan hmuh tur an awm ta lo. Ka hneh ta nilovin, ka tur a la thawk a ni ang e.
*Chukchu- Common cockroach (Periplaneta americana)
*Deltamethrin- Insecticide, neurotoxin(common trade name Buttox, K-Othrin)- He damdawi hi a hmang thiamlo leh instruction uluk taka chhiar peihlo chuan hmanchiloh! Tin, thosilen chhiah, malaria venna atana an hman k-othrin pawh hi deltamethrin tho a ni, mahse a concentration a chak vaklo. A bur khat hi tui nen a pawlh dal fe hnuah hman chauh a ni. A haw tan chuan tlem a thak neuh neuh a thlen ve thei a, mahse a nasa lem lo.
Chukchu chalk- Chukchu chalk ah pawh hian deltamethrin tlem an telh .
