merry christmas

Days are longer...nights are lonelier...this christmas..
ka damlo dawn tih kha ka hre lawk deuh, mahse in dimna tur hun awm silo...taksa a chaklo deuh tawh tih hre reng chungin hna kha ka tilui tang tang...a in thamna a rei tawh..mahse..mahse a tul si a le...christmas te chu kan dam anga kan la hmang leh ngei turah ngai ila. damlo tan chuan damna a pawimawh ber...mu daih teh ang 2015 christmas urlawk zan chu...

Stop-look-go

Pawl 3 kan zirlai chuan 'Moral education' kan zir a. Chuta kan zirlai ah chuan kawng kãn dan kan zir tel thin. Kawng kãn hmain dinglam,veilam leh hmalam thlir hmasak hnuah chauh kawng kãn tur tiin kan zir thin. "Light a awm chuan a sen a en chauhin kawng kãn tur" tiin kan zir bawk.
Tichuan hringnun kalkawngah chuan ka kal ta a, chu kalkawngah chuan lawmna te, hmangaihna te, harsatnate, mangannate leh lungngaihnate te a lo tam hle mai. Din hmasak a, veilam leh dinglam uluk taka thlir a, pen chhuak chauh tur nisi kha, en lovin kawng ka lo kãn pek anih chu!. Uluk takin ka kãn tur kha thlir ni ila chu, ka kãn sual bik lo tur le.
Voin ka thil tawn chu, "chhunnu i chawi lai nau ang a tap e, ban zai a rel thei silo, nau ang min awm la,  chawnban ah vuanin min hnem la" tih mai ka nap e!.
Chu hringnun kalkawngah chuan kawng en lovin ka kal a, a lai takah, tui lai rap ang maiin kal ngaihna hre lovin ka ding ta a, hliam ka tawk ta. Ka hliam chu a na, tuan zai reng rel a har ngei mai.
Chu hliam chuan khum betin min siam a, ka vei, ding leh hma lam min thlir let tir ta. Aw...kei mi mawl hian ka zawh tur kawng chu ka chetsual hnuah chauh ka thlir let a, Tui bua a ruh leh theih tawh siloh. Ka zawhsual kawng chu uluk takin ka thlir kir a, tham ral lo mit thla an ka hniak ka chhui let ta chuan chuan mai a. Ke ka chheh sualna te, ka mit tih fiahloh a nih dan te, ka hmuh duh leh hriat duh chauh hria ka nih dan te a lo lang uar uar mai. A chiang asin, ka thian,  "emaw" ka lo tih, ni silo te chu a lo lang lurh lurh mai a, hnar a lian duh voh voh hle mai. Tumah dem tur an awm chuanglo, keima kawng kãn fimkhur loh vang vek a ni. Hawilo ta na chu ka in chhuih thlu leh ta!
Mahse mipa fa ta na chu, engpawh huamin, ka seh chu ka seh, val in ka ngam a, ka rim a, ka rim thlu ta angah ka in ngai. Kalkawng erawh en chiang hmasa ila chu ka hliam lo tur le! Pawl 3 a kan zirlai kha tun thlengin a lo la dik reng a ni tih a lan chian tir  bawk.
Tichuan le, sap thu fingin " a tihhlum lo tu che chuan a tichak zawk thin" tiin a sawi kha. Ka hliam hian chatuan a daih tawp lovang!, a dam anga ziak loh zirlai chuan min tichak zawk ngei ang le. Ka thian, 'stop- look- go' hi lo chhiar la, pawl 3 kan pass ho dawn ania!

Lalkulha

Hmanni kan office bang chu Pu Lalkulha, Mizoram inbuan chak champion thin kha kawnglaiah a kal nulh nulh mai kha scooty in a tai deuh a. A palian sia, hnung lam hawina chang a hrelo nge a beng a ngawng deuh tawh ni ang, scooty khan muang changin pelh a tum a, horn a pe a, scooty tlanna lamah a ni a kal bawk si, an intai deuh a. Vanneih thlak takin an na lo ve ve a.
Pu Kulha hi a chanchin a thang nasa thin hle. A vanglai sawi tha duh nise a chak zia leh a to zia a sawi teuh thei ang chu. Khawi laia nula in emaw an hel nasat zia ha hipin a sawi thei ang chu. Hmanah a thingtlang awmna ah bike in a kal a, kawng a lo diak nal deuh a, a bike kha a pu lawk a, kawng that deuh hnuah a nghat a, a kal leh mai a..tiin an sawi thin. khati khawpa mi chak kha tunah chuan putar, tiang nena khawlai kal thin a ni ve a. Hringnun lamtluang ah hian kan upa zel anga, kan taksa chakna leh kan hriatna a lo chuai zel anga, thalai te pen ruala kan pen ve theihloh hun a la awm dawn si a.
Zanin ka kekawr tlang thlehna chhia ka thui tur pawh hriau bengah khawla ka thil thei mai lova, kan nau tleirawl chuan awlsam takin a thil mai si.
Tunah chuan kan nih tur ang leh kan kawng zawh tur ang chu kan zawh ta, lei kan zawh tantirh laia kaihhruia kan ngaih lai te, mahni ke a kan ding tan tirh lai te kha thamral lo mitthla an a la cham reng anga, "kan vanglai" tiin kan la ngai awm si a. Pawimawh ta deuh ni a kan hriat pakhat chu- he khawvel a kan cham chhung hian enge hnutchhiah tur, hriatreng tlak kan tih le? Mi ten engtin nge min hriat reng ang? Hriat reng tlak kan ni ang em?

Kum a tam ve ta

Kum 35+ ka ni ve ta! Bible in mihring dam hun chanve chu ka lo zawh ve ta reng mai. Min veng him tu Pathian hnenah lawmthu awm se. Mite ngaih a chuan tlangval senior ka lo ni ve ta reng mai!. A ni, "kum 33 ah nupui ka nei ang" tia ka lo sawi ve chu ka bawh pelh ta phawt mai chu ania, remruatna chu mihring lam chan....tia ziak a nih kha maw.

He khawvel ah hian hringnun ziakloh zirlai hi ka  tawng hnem ta hle. Mi ten 'kalphung' leh 'nunphung' tia an sawi thin zawm ve phalo, mahni kal a kal tan chuan  ' tihdan' hi a lo awm lemlo. Ka kal dan hi ka tan chuan 'dan' chu a ni za ta ber mai. Mite siam kawng chu zawh ni ila tuna ka din hmun hi ka luah pha ang emaw chu le?. Mi thu leh ngaihdan zawm diam2 ni ila he dinhmun ah hian ka in hlang kai ang em? Keima kalphung, tihdan leh duhdan  hi hloh ta ila " keimah" min ti keimah tu kha a awm tawh dawn silo. Mi ropui leh mi chunga leng mihring ka nilo tih erawh ka in hre chiang. Chuvang chuan ka kaldan hawtu  chu ka hnaih ah awmlo mai se, ka hmai chhan a min fak ar ek a hnung lama min nuihtu chu ka thian nilo mai sela, min kiansan se. Ke ka pen ruala pen ve theilo chuan min zui lo mai se! Aw...mahni in ngaihsanna khawvel a lo nih hi! kei pek hi!