Vawin hnathawk tur a ka kal chu nufa in kai ka tawk a, ka enchiang a, naute kaitu chu ka thianpa star em em kha a lo ni a, suangtuahna khawvel ah min hnuk lut ta daih mai. Mahse a lairil sawngbawl hma in thu hma nei hmasa ila.
College kan kai laiin thianpa pakhat hian nula a star thu a sawi thin a. Amah kha zu te a in ve thin avangin nula pangai leh fel tak chu bem en ah pawh a en lova. Chu nula chu nula sang lam, hmai hlai lek lek, ngo lam deuh, dar kum lek lek, sa pan lam deuh, laibu tha tak, nui mawi tak a ni awm e, a sawi dan hmang chuan. Tichuan kum a lo vei ta nual a(kum 5 vel), thianpa chuan a nunhlui te simin chu nula bawk chu a rilru ah a cham teh chek ni fa hmiang, an runsang a kai ta hlawl a. Vanduaina thuah thip in a tawng nge kan nula-i chuan ngaihzawng nghet a lo nei hlauh mai, inneih an lo sawi ri deuh lehnghal a. A tan vanpui a chim ta rup mai.
Ka thil hmuh kha hmu ve ta se engtin ngai ang maw?. A thik ang nge rilru na tak, insum takin a lawmpui ang le? Mahni chuan ka inkawm ta melh melh a. Mi tin kawp pui atan mi duhzawng kan nei theuh a (Thianpa duhzawng chu ka tawmpui kher lo), chutianga kan duh deuh te chu eng emaw rem lohna avangin ngaihzawn pawh in ngaizawng si lovin kumsul tam vei se kan duhna kha a la ngai reng ta sela.
Kan suangtuahna khawvelah chuan ‘ni ta se’ tiin kan bawl phuan zui a. Hetiang ang hian duhaisam ainawn-i ten kawp pui nei a, fanau nen an kawi hmu ila, thinlai a tharin rilru a la luah ang em le? Chu ainawn-i nen chuan inngaizawngin, eng emaw avangin in thenin, tang dang min vawn san se, rilru a dam zawk ang em le? Chhan let loh hmangaihna ni chiah lo mahse a nih dan kawng a awm tho a, kan duhna kan lantir si loh chuan chanlet theih ni hek lo le. Thinlai mu hnu kaithovin duhthusamna khawvelah bawk leta ngai ngei ang. Nghilhloh awinawn-i chu nghilhni a awm dawn silo.
Hetiang ngaihtuah chung zel chuan ka hna thawhna hmun tur chu ka thleng ta a.
