A seh seh....

Tunlai chu inthlan a hnaih vang nge ram hmangiah kan pung thar ta thut ? Kan sawrkar lah kil tin a dengtu a ngah hle bawk a. A dengtu nge sual ang a den aw? Heti chingchivet nuaih a kan ram kan her let let lai a lairil fantu chu chaweikhawm ti ti fahrah zuk ni tlat pek a. Eirukna chungchanga mi tam tak fihlim lohzia te, kan ram a thil kalphung ka la hriat ve ngailoh tha tha (chhia chhia) tha min fahtu te zarah beng a tlai, rilru erawh a na vawng vawng mai.

Chimthal bekang puah ang phawng phawng ila. Thian pakhat chuan dikna a awm toh loh thu sawiin kan Minister te hi dem tur an nilo, chu ai chuan anmahni khaltu Officer ho hi an dikloh thu a sawi a. Office a thawk thenkhat tenawmzia a sawi zauh bawk a. Ti ti kal zelah chuan kan Treasury office a thawkte tenawmzia an sawi chhuak a. Bill pass hma tir duh chuan an lehkha hnuaiah Rs.1000.00 note 2-3 vel dah tel a ngaih thu a sawi mauh mai a. Hetianga tih loh chuan bill an la thei lawk lo a, an tih erawh chuan a ni la la in an la thei si a. Thla tam tak nghah a, reject na tur, holam tak an zawn thu nen…aw….pawisa pek mai a awlsam ber thuin an tlip a. Office a thawk cashier pakhat vet hung chuan an bill pass ngai tawh tak a thehluh hnua a khawihtu in “Mobile lei ka duh a Rs.5000.00 min lo pe”ti a a dil tawp thu a sawi a. ‘Kan bill pass a ngai toh sia kan pu te ka rawn a, pek mai an ti ta a” a la ti zui!

A bu pui ka keu ta le, hei zet chuh. Central sawrkar a pawisa sawichhuah dan tha leh a sawi chhuak thei ten an tihdan an tlangzarh ta le! “Percentage pek tur pek tlak thei chuan a ni mai” Eng percentage maw? Sipai bo ka bang map mai le. Central ah khuan Cheng za( Rs. 100.00 ) dil ta la, cheng sawm (Rs.10.00) kha a khawitu hrang hrang te in semah pek tur neih chuan cheng za dawn, neihloh chuan chan. Chu chu a ni percentage chu. Hrethiam ta uar uar mai.Mobile Medical Unit (MMU)a mawtor hlui te, OPD chawng khat bo te, MIP pawisa dawn kimloh te?, Referral hospital te, .... Tih danglamin ka awm ta, acha... ka hrethiam e. Central a Minister tu tu eamw, IAS te emaw, DONER minister te emaw kha percentage an han pe a, chutah a changtu Minister percentage, a officer thurualpui percentage, khawi “Run”, ‘Bhavan” emawh percentage, Contractor percentage, Contract hralhtu percentage…chung zawng zawng hnua hnathawhna tur la bawng chu a tlem awm. Motor hlui/building chhia/ lungrem chim…ka var ta uar uar mai.

Dikna duh mi tam taka awm mahse diklohna hian bu a khuar thuk ta. Mawhphurhna a va han lian take m? Nang leh kei hian kan hma ngam an em?

‘Kutdawh tan chuan huai a har’ kan ti dawn nge ‘Intodeh loh chuan rinawm a har’ kan ti zel dawn le? Engtin ni ta ang ang maw?